黃光裕罰款 國美小股東大叫「回水」

【明報專訊】可能係全國最富有嘅囚犯——國美（0493）創辦人黃光裕，之前畀證監會判罰向公司賠償4.2億港紙，國美噚日召開股東大會，提議將筆錢撥入流動資金，小股東就梗係大叫「回水」要求派息啦，不過最後都畀管理層講句「會考慮」。


噚日國美管理層對媒體齊齊封口，而到場嘅小股東就話公司未正面回應股東提出嘅派特別息、賠償資金用途等疑問。小股東就大歎對公司十分失望，稱咁多年來因黃光裕內幕交易、內鬥而大蝕底，家連少少息都攞唔返。


黑仔小股東買咩輸咩

其中一位自稱Jenny、由內地過來香港已幾十年嘅小股東就堪稱「地獄黑仔王」，佢話當年因為知道國美喺內地好多舖、環境又好，所以3蚊入貨，點知之後醜聞一單接一單，股價最差得番幾毫子，令佢翻身無望，咁都唔止，佢原來之後又買青蛙王子（1259）、博士蛙（1698）中晒招。「我點知道內地公司咁多蠱惑嘢，我應該買李嘉誠嘅公司。」小琴又教精你，買超人啲公司都要做好功課㗎！


[小琴密語]