劉燕卿問准女兒做專員

【明報專訊】新任申訴專員劉燕卿（Connie）上任唔夠一個月，噚日佢一身紫色打扮同傳媒茶敘。原來Connie前年離開咗消委會之後，有十幾份工搵過佢，公私營機構都有，有啲仲要返大陸、去美國工作，但佢都不為所動，佢個女亦話太辛苦，叫阿媽唔好做。


Connie透露，佢個女有咗6個月，點解唔弄孫為樂？Connie話覺得申訴專員一職任重道遠，好有意義，可以繼續服務市民，仲笑言已經問准個女先接受offer。Connie為咗新工，仲卸去咗聯合國轄下貿易及發展會議消費者保障國際顧問專家小組主席及十幾份公職，但Connie認為始終要有取捨，唔覺得可惜。今年係申訴專員公署成立25周年，但Connie話除咗拍新宣傳片外無乜特別慶祝活動，而一間機構25年其實仲好年輕。