林飛帆：台學運借鏡佔中

【明報專訊】台灣學生佔領立法院事件落幕，而學運期間去咗台北八卦嘅佔中義工陳淑莊同徐少驊，就乘機訪問咗台灣學運領袖林飛帆及施懿倫。林飛帆話，原來台學運都受到香港佔中嘅「商討」（deliberation）理念啟發，話有啲同學，嚟香港時睇到佔中搞過幾百個人商討民主活動，「這個經驗影響了我們的運動，所以有些伙伴借用了香港的經驗，所以搞了『街頭審議』」。


借港「商討」理念經驗 搞街頭審議

林飛帆又話，佔領立法院前一天，佢哋幾個學生仲喺度同老師討論幾個可能嘅行動方案，直到佔領前幾小時，佢哋先正式確定佔領行動，所以一開始時「狀况蠻混亂」，但後來各方自動捐獻物資，「反映了民眾對馬（英九）政府是非常不滿」。


台灣太陽花學運標榜「非暴力」，贏得民眾體諒支持；不過，林飛帆個人認為「非暴力」並非絕對。「如果有一天這個獨裁暴政狀况已是忍無可忍，是不是還要堅守這個原則？我沒有答案。」


學運領袖訪問內容將刊於明日周五出版嘅佔中刊物《中紙》第二期。《中紙》第一期面世3個多星期，佢哋義工已喺街頭派出超過3萬份。