胡志偉：同絕食戰友餓出感情

【明報專訊】泛民首輪絕食爭普選行動已喺星期日結束，民主黨胡志偉話，16日絕食嘅經驗令佢重拾1990年代參加社會運動嘅感覺。志偉話，上一輩嘅民主同路人多係社運戰場中認識，不過近年大家嘅交流就限於遊行示威中點頭交流，深入有限，而今次嘅絕食行動就令佢同工黨郭紹傑、林祖明「絕食絕出真感情」，佢哋已經約喺復活節後一齊打邊爐。


再絕食 要申老婆不反對通知

今次絕食堅持到最後嘅只有民主黨同工黨成員，但志偉就話爭取普選好似踢波，前鋒、中場、後衛缺一不可，唔能夠只做英雄，佢希望今次行動只係第一步，日後同其餘泛民政黨可以有多啲合作。對有網民質疑佢哋扮絕食，志偉話如果對方有懷疑，下次可一齊參加，佢哋絕食以明志，並非絕食求死。至於第二波絕食行動佢會否參與？志偉就話如果有需要佢唔介意，但老婆大人一早落咗命令，話參加絕食要先申請「不反對通知書」。


中聯辦主任張曉明話會陸續約見無去上海嘅議員，志偉話一旦獲邀會考慮出席，即使入中聯辦都無有怕，而爭取普選路上只要不卑不亢、立場堅定，無咩地方唔去得。