Webb嘲積金海報有「基情」

【明報專訊】廣告可以發揮宣傳嘅功效，但如果設計得差，一個唔覺意畀網民惡搞，好容易會有反效果。積金局最近就有一張宣傳海報（見圖），雖然未見有網民惡搞，但相信係最專業嘅網民之一，有「股壇長毛」之稱嘅David Webb就話張海報「基情」無限。


積金局張海報主要講今年6月1日起，強積金嘅最高入息水平調高至3萬蚊，但唔知點解，幅圖就搵兩個男人一齊跳繩，仲跳得好開心。David Webb引唔住發長文，話點解呢兩個男人跳得咁開心？「相信係因為，佢哋係香港首宗同性婚姻嘅主角」。


一向堅持廢除強積金嘅David Webb，再度唱衰強積金。「打工仔每個月供樓之餘，仲要將人工5％拎出嚟供強積金，強積金受託人可能同佢嘅按揭同屬一間銀行，而且佢既強積金亦好可能用咗嚟投資喺呢間銀行。」既然成件事咁荒謬，點解海報入面呢兩個男人仲咁開心？「唯一嘅原因係﹕佢哋係強積金基金嘅投資經理」。


email: piano@mingpao.com

[小琴密語]