蘇錦樑劉江華返娘家跳街舞

【明報專訊】民建聯千萬籌款晚宴成績斐然，除咗捐款人疏爽外，一眾表演者都唔欺場，精心炮製吸引視線嘅節目，其中最令人「吃驚」嘅，就要數一眾民建聯出身、包括商務及經濟發展局長蘇錦樑在內嘅4個問責高官，佢哋戴住黑超、著住西裝，「撐吓撐吓」咁學人「跳街舞」。


同蘇錦樑一齊「返娘家」獻技嘅高官，仲有政制及內地事務局副局長劉江華、蘇錦樑嘅政治助理陳百里，同民政事務局政治助理徐英偉。講真，音樂雖勁，4人其實唔係幾啱beat，人人節奏又唔多協調，其中蘇局長就最投入，佢同Emily講事前練咗3個周末，為民建聯真係咩都肯做。


譚耀宗唱《舊歡如夢》籌400萬

立法會主席曾鈺成就例牌唱歌，曾太仲好認真，著埋條民族裙伴舞，呢part籌咗約200萬。


而民建聯主席譚耀宗同樣開金口唱《舊歡如夢》，仲有成班立法會議員兄弟伴舞，好鬼搞笑。呢個環節就籌咗400萬。


籌款宴改兩年一次

相信今次揼心口都為民建聯籌到6000幾萬元，譚耀宗都向在場嘉賓派「定心丸」，講明決定唔會年年搞大型籌款晚宴，變成每兩年搞一次。