民建聯拍片招會員

【明報專訊】2014年係青年民建聯成立10周年，亦係民建聯嘅專項會員發展年，一季過去，民建聯又有新搞作，就係拍短片招募新會員。民建聯副主席張國鈞話民建聯招募會員順利，但各委員仍有壓力，例如2.53萬會員中，暫只有1400幾個係青民成員，佢哋嚟緊亦會發展專業、工商會員入黨，遲啲會搞多啲青年就業講座，希望令人哋覺得民建聯唔係只得地區工作。


李慧琼客串 同女主角握手

短片以「為理想去做」為主題，講一個年輕會計師，點樣透過加入民建聯活動搵到「人生方向」。另一民建聯副主席李慧琼亦有客串角色，同女主角握手，但片內唔少演員其實唔係民建聯成員。


民建聯副秘書長葉傲冬話，搵專業演員唔搵黨員拍短片，因為演員好戲，又話大家都係老友記、拍膊頭幫手，唔排除日後會搵埋演員入黨。另外，民建聯亦搵咗19個年輕黨員寫自己喺黨內嘅小故事，準備於書展推出，但未有書名。青年民建聯主席周浩鼎會喺書中講吓佢點樣致力喺《城市論壇》為民建聯創出新天；北區區議員劉國勳會講自己喺黨內識到太太嘅故事。