李克強訪海口 不及工人誇海口？

【明報專訊】國家領導人嘅一舉一動一向受民眾關注，不過最近有個工人就搶咗總理風頭，話說國務院總理李克強噚日去海南海口港考察，有內地媒體訪問其中一位同總理傾偈嘅工人指出，李克強主動關心碼頭工人薪水情况，工人回答話自己帳面有8000大元（人民幣．下同），實際到手都有4000蚊。不過，唔少網民即時大呻，都認為呢位碼頭管工做Show報大數。


嗰位名叫符朝榮嘅管工喺海口港做咗27年，今年成54歲，據佢回答總理講帳面人工係8000多，扣晒包括公積金、社保、風險金等，實際到手仍有4000多，兌番港紙都接近4900蚊，喺內地已算高。


不過，微博上面唔少網民轉發消息，大部分人都話符朝榮報大數。其中一位網民就話，「我嘅帳面工資4000元也沒有！」另一位網民就笑言自己無話可說，唔好意思拖了海南人民嘅後腿。


[小琴密語]