CY煲呔舊居不同命

【明報專訊】政府經過逾兩年活化工程，終於將中環鴨巴甸街35號嘅荷李活道前已婚警察宿舍，變身本地設計新地標「PMQ元創方」創意產業中心。其實，特首梁振英（CY）同埋前特首「煲呔」曾蔭權，細個時都係宿舍居民。營辦機構將CY住過嘅單位改成圖書館，仲請佢拍短片介紹當年居住情况；至於煲呔住過嘅地方就無特別處理，唔通營辦機構「大細超」？


營運者：無刻意理會誰住

創意產業中心噚日開始局部開放畀公眾參觀。Emily聽講，CY細個住喺H座（北翼）5樓，咁啱嗰層PMQ用作做資源中心，當中疑似CY住過嘅H503單位就會做圖書館，畀進駐嘅設計師借書。


喺對面S座（南翼）5樓就設展覽廳，播放咗一段短片，有CY同藝人「叉燒炳」劉丹分享佢哋住喺度時嘅生活點滴。煲呔就曾住喺S座（南翼），但住邊個單位暫時無從得知。不過，負責營運中心嘅PMQ話，規劃樓層用途時，無刻意理會有乜人住過邊個單位，只係咁啱CY住嘅樓層較高，適合畀海外設計師暫住同做資源中心咁解。


本地設計師進駐 下月試業

講番S座5樓展廳，仲有重現昔日警察家庭部分家居設計同照片。PMQ元創方係2009/2010年《施政報告》提出「保育中環」8個項目之一，亦成為首個完成嘅項目，等一班本地設計師進駐做工作室同推廣自家設計產品，下月初正式試業。