斥寶baby漢奸 「網民」點錯相？

【明報專訊】「香港2020」召集人、前政務司長陳方安生同民主黨創黨主席李柱銘（馬丁）早前去美國同副總統拜登傾香港民主發展，噚晚落機。噚日朝早10點幾，保衛香港運動發起人傅振中就周圍打畀記者問兩人幾點落機，話想搵人去示威，抗議佢哋搵外國勢力干預港務。


晚上約8點，Emily同行家去接機，已見到20幾個自稱「網民自發」嘅叔叔嬸嬸，由一個林先生帶頭，帶埋示威標語準備示威，點知未等到馬丁，就見到咁啱出埠返嚟嘅東亞銀行主席李國寶（圖），大批記者爭住上前叫「李生！影幅相吖！」點知班「網民」聽到「李生」，即刻上前大嗌「無恥！漢奸！賣國賊！」唔知係咪誤當寶baby係李柱銘。記者問李國寶無端被罵有乜感想，佢面燶燶無出聲走咗。Emily打番畀傅振中，佢就話班示威者唔係佢啲人，仲話香港好多人好憎馬丁同陳太，有其他人去示威唔出奇。