議員趕去機場 飛機delay合時

【明報專訊】立法會議員噚晚完成兩日一夜上海訪問團，馬不停蹄，會見京官時更加超時，甚至影響佢哋返港。不過，當議員擔心緊趕唔切下午5點集合去機場時，立法會秘書處職員突然宣布飛機突然delay一個鐘，有泛民議員噚日講笑，唔知係咪主席曾鈺成打畀港龍叫飛機delay？Emily問過曾鈺成delay事件，佢就笑而不語。


建制呻行程密

曾主席今次拉攏訪問團都算勞心勞力，行程豐富緊湊，Emily聽聞唔少建制派都有嘈，但曾鈺成就同Emily講，議員投訴就好似食飽飯嫌菜多。


另外，建制派前晚同特首梁振英（CY）一齊食消夜，原來曾伸出友誼之手邀請泛民一齊食，但有泛民同Emily講，獲邀時唔知CY會去，加上佢哋連觀光都唔會去，消夜當然唔出席。其實當晚新民黨、自由黨、工聯會都無去同CY消夜。


自由黨田北俊話佢唔知CY會去食消夜，新民黨田北辰更加唔知有約消夜，而佢一早就安排咗去巡舖。


工聯會陳婉嫻就話訪問行程「繁忙」，「不如早啲休息，返去瞓覺」啦！