「熱刺躉」馬斐森踢波拼搏

【明報專訊】噚日喺港大舉行嘅第11屆兩大校長杯，港大校長馬斐森（Peter Mathieson）同中大校長沈祖堯都有出席開球禮，上任無耐嘅馬斐森仲全副武裝上陣，著住6號仔球衣落場踢咗15分鐘，沈祖堯就無落場。踢左中場嘅馬斐森都踢到一兩腳波，其間有盡力追波，精神可嘉。


無比賽35年 落場15分鐘

兩大校長杯2003年開始舉行，以紀念兩大喺SARS期間互相合作。兩個校長擲銀仔決定開波次序，結果由馬斐森開波，跟住踢足15分鐘，太太都有到場支持佢。大家對來自英國嘅馬斐森球技有啲期望，但校長笑謂雖然自己有睇波，係熱刺球迷，但落場比賽對上一次已經係35年前，仲話呢兩星期掛住食，無乜運動，擔心連累港大隊。校長離開之後比賽開始變得緊張，最後由中大隊以2比1勝出。


馬斐森話，開始工作兩個星期成日喺學校閒逛，同學生傾吓偈。上星期五佢就出席咗校內學生會嘅高桌晚宴，席間唔少同學邀請佢合照，仲有人同佢討論六四、佔中等議題。佢話上任前已經預計到大家會好關注佢嘅工作表現，會努力保護港大自由討論嘅風氣。