張家輝拍片 籲防冧山泥

【明報專訊】土力工程處每年喺雨季前，都會呼籲市民對山泥傾瀉提高警覺，尤其近年全球氣候變化，極端天氣出現次數愈來愈多，香港亦難獨善其身。土力處搵咗影帝張家輝拍攝全新宣傳片，影帝喺宣傳片中話，唔好以為連場暴雨同山泥傾瀉呢啲場面只會喺電影出現，萬一喺香港發生，市民要配合政府嘅緊急行動呀。


Emily打聽下，得知呢輯宣傳片係土力處委託一間製作公司做嘅，製作費70萬有找，大部分花喺電腦動畫，模擬山泥傾瀉驚險場面，聽聞張家輝知道個廣告有意義，好爽快應承，無計較收費。


查實香港嘅山泥傾瀉風險已降至非常低嘅水平，只係1977年（土力處成立）嘅25％，但副土力處長歐陽仁生話，近年雨愈落愈大，對斜坡好大威脅，如果乜都唔做，山泥傾瀉風險可能回升，所以該處制訂咗三大措施，包括用泥釘加強斜坡穩固、加強斜坡排水力，以及加建天然山坡防治工程。