訪滬泛民「買蛋」內地上網

【明報專訊】立法會議員今日去上海訪問，一行團員原本有57人，不過未出發先有人退團，令議員團得番56人，唔通返大陸真係咁得人驚？Emily聽聞，泛民議員一早做好心理準備，諗定去上海會有人竊聽同監視，仲一早授權IT界議員莫乃光做防範網絡監控。


莫乃光話，佢已做好準備做「客戶支援」，至於會唔會教議員用VPN翻牆？莫乃光話「對佢哋嚟講太雜複」，所以佢一早諗好計，秉承泛民「雞蛋抗高牆」理念，一早買定幾隻俗稱「雞蛋」嘅Wi-Fi發放器，等議員可以安心用Wi-Fi。不過莫乃光坦言如果大陸要監控、要竊聽，佢哋點防都無用，只能盡量唔好令對方有機可乘，例如酒店Wi-Fi、酒店電腦就唔好用喇。


割完瘡 鄧家彪退團休養

至於臨時退團嘅並唔係泛民議員，而係工聯會鄧家彪。原來佢前排割咗頭瘡，縫針後醫生怕傷口有感染，所以叫佢唔好外遊，所以佢噚日向立法會請假。