黃碧雲帶德怡家長「突襲」

【明報專訊】接連幾間幼稚園被迫遷惹市民關注，噚日民主黨黃碧雲帶埋幾個家長去立法會嘅民主黨辦公室，同教育局副局長楊潤雄開會傾呢單嘢，成功跑贏其他政黨。不過，Emily收到風，原來黃碧雲係「突襲」副局，呢個會議本來一早約好，傾下周教育事務委員會嘅議程，黃碧雲突然改會面議題，副局睇在一班家長份上先至奉陪咋。


Emily聽講，楊潤雄噚日堅持先同黃碧雲傾咗原定議題，要德怡幼稚園家長喺外面等一個鐘，先至見佢哋。家長同佢話，希望政府出租空置校舍畀德怡，等佢哋嘅仔女有得讀落去；楊潤雄就講出難處，例如政府難補貼私校，但無拋出方案，一嚟問題複雜，二嚟幼稚園事務一向由教育局長吳克儉揸莊，有咩都應該由佢講。點都好，高官肯聽民意，家長都感到安慰。