拆枱風波繼續離奇

【明報專訊】立法會議員司機休息室日前發生波枱離奇被「強拆」風波，Emily繼續留意，噚日又打聽到未必係秘書處拆爛，而係另有司機不滿有人喺休息室放波枱、喺工作時間打波，所以有人拆枱嘅說法。事件繼續離奇。


有指拆枱另有其人

話說一班議員司機夾錢買咗一張幾千蚊嘅乒乓波、美式桌球兩用枱，前幾日忽然畀人拆散，一班司機忽然無得篤波，又無人出嚟認數，前日聯署要求立法會秘書處交代事件，希望拆枱者道歉及賠償。有司機大佬同Emily講，佢哋今日會再同秘書處見面，若到時秘書處仍未有交代，佢哋會報警！秘書處前日回覆Emily時話，休息室唔係用嚟打波，但至噚日都無回應佢哋有無拆枱。Emily聽聞，有人話拆枱嘅人唔係秘書處人員，亦有人話係立法會主席曾鈺成嘅司機，因不滿有人喺休息室放波枱，所以拆枱。


Emily噚日問曾鈺成，曾主席話對呢場風波不知情，仲反問拆枱者有無「畀人砌（打）」。至於司機喺休息室篤波是否恰當、立法會行管會使唔使討論吓？曾鈺成話佢哋會收到投訴先處理。立法會秘書處噚日對邊個拆枱問題仲係不置可否，只係話收到司機投訴信，會約佢哋會面。