學校禁帶手機 長毛代出頭

【明報專訊】呢個年代乜嘢都有人投訴，學校唔准學生帶手機，有家長及學生仲投訴到去立法會議員度，難得社民連立法會議員梁國雄（長毛）又肯去處理。長毛話，早前收到馬鞍山聖若瑟中學嘅學生同家長投訴，話學校唔准學生帶手提電話嘅校規唔合理。長毛就呢啲咁嘅投訴，正式向教育局長吳克儉提出書面質疑，問《教育條例》內有無講過唔准學生帶手提電話返學校？


教育局就話，《教育條例》同向資助學校發出嘅指引，都無特別就學生攜帶手提電話回校作出規定，指學校可因應校情作出安排。


長毛同Emily講，寫校規時都未有手機出現，仲話家好多家長都會叫仔女帶手提電話，方便溝通，所以間中都會收到學生同家長投訴學校唔准帶手提電話。


校長：家長問卷七成反對

聖若瑟中學校長黃幗懿回應話，學校每年都會就學生應否帶手提電話做家長問卷調查，佢話最近一次調查有七成家長反對。佢強調若同學有需要帶電話回校，其實可以書面申請，但電話就要暫放喺校務處。