海怡新星 愛地區唔諗立會

【明報專訊】好多人都希望透過做區議員，再「升呢」做立法會議員，不過剛剛當選南區海怡西區議員嘅新民黨小花陳家珮（Judy），笑言自己「無咩大志，未諗過立法會」。佢話眼前最重要係做好地區工作，為下屆區議會選舉鋪路，「想繼續保住個位」。


陳家珮自稱無大志

Judy話由細到大未試過被人指住鬧，不過競選期間就遇到唔少呢種情况，都要啲時間適應。海怡西選區過去好似「旋轉門」咁，有唔少呢區出身嘅區議員同地區工作者都入咗政府工作，例如新聞統籌專員馮煒光同教育局長政治助理施俊輝，但Judy講明「政府工對我嚟講無好大吸引力」，話自己見義勇為，鍾意地區工作多啲。


講到未來工作大計，Judy話除咗要處理區內交通問題，特別係港鐵南港島線，仲計劃喺區內引入廚餘機推動環保，希望利用廚餘製作肥料，為區內樹木施肥。