李麗珊只睇世盃精華

【明報專訊】四年一度嘅世界盃就嚟喇，球迷肯定睇，即使唔係球迷，為咗親友都會關注吓。好似有兩個女嘅「風之后」李麗珊咁，佢話自己唔識足球，但女兒細個時亦有喺屋企玩吓，幾有興趣。嚟緊嘅世界盃，佢都會同屋企人一齊睇，投入吓大賽氣氛，但因為要作息定時，所以只會睇精華，唔會睇直播喇。


李麗珊噚日出席「賽馬會青少年足球領袖計劃」，並擔任導師，佢話當年有人講過做運動員無前途，但佢自己鍾意運動，所以堅持理想。佢個大女家已經8歲，珊珊話囡囡升中後可能會有自己生活，所以家希望陪佢哋多啲，但就講明即使日後唔使忙住湊女，都無意重投全職工作。


馬會青年足訓 優異者去睇曼聯

馬會呢個計劃會喺北區、元朗同南區公開招募45名16至19歲青年，4月中起接受為期3個月足球訓練，表現優異嘅4至6個學員將獲資助，今年暑假去英國曼徹斯特參加社區活動、交流經驗，同參觀曼聯球隊比賽等。