絕食泛民虛弱 遊行搭車代步

【明報專訊】民主黨同工黨嘅爭普選絕食行動今日踏入第12日，20多名泛民成員噚日由匯豐總行遊行到政府總部，話要抗議政改假諮詢，絕食四子就因為身體虛弱，開步後改為搭車去政總會合，喺政總度過絕食第240小時。4人帶同300封市民簽名支持真普選嘅信去政總，但政務司長林鄭月娥同政制及內地事務局長譚志源冇出嚟接信，佢哋於是將市民嘅信帶走，剩係向政府派出嘅代表遞交四子寫畀林鄭嘅公開信。


泛民遊行完喺政總有個「雞蛋抗高牆」行動，就地擲爛雞蛋，用蛋殼砌出「真普選」3個字。問到李卓人驚唔驚畀人話係「大嘥鬼」，佢話要打爛雞蛋先象徵到絕食者透過自殘爭普選嘅決心，大家會明白，又話如果林鄭肯接信就唔使擲蛋抗議。


噚日絕食四子身體大致穩定，但個別開始有體溫下降等狀况，但佢哋話冇訂立絕食時限，堅持到最後一刻。兩黨就批評政府唔理絕食者係涼薄表現，要求政改三人組聽民意。