拉布前夕 財爺睇港產片

【明報專訊】立法會聽日開始處理財政預算案審議程序，二讀恢復辯論《2014年撥款條例草案》，部分議員已表明拉布，提出至少逾1900項修訂。財政司長曾俊華噚晚就偷閒去戲院睇戲，揀咗由羅霖等主演嘅情色電影《愛．尋．迷》。


逾1900修訂 按掣都要5日

人民力量、社民連等議員早預告會喺審議預算案時拉布，唔滿意財爺唔肯派現金等，方法係提出大量修訂，如削減官員薪金等，據知截至噚日下晝6點，立法會秘書處已收到1917項修訂，當中長毛梁國雄一人已提逾千條。議員噚晚午夜前仲可以繼續增加修訂。


立法會舊年審議700多項拉布修訂，已經開會開到天昏地暗，就算唔計議員拉布發言，今次單係按掣表決1900多項修訂，就要花5日會議時間，相信周三條例做咗二讀後，5月嘅會議就會上演拉布戲肉。


拉布或會令財爺好頭痕，而佢噚晚就暫時忘憂，去戲院享受一下，睇《愛．尋．迷》。呢套戲有唔少火辣情慾鏡頭，賣點之一係3個唔同年紀嘅性感女主角，包括熟女羅霖、模特兒Mandy Lieu及新人盛朗熙，唔知財爺鍾情邊位呢，但財爺嘅身邊人就叫Emily唔好亂諗，今次去睇戲，係想支持一下處女執導嘅專欄作家陶傑。陶傑早排去信邀請財爺捧場，話佢套戲係「寫實愛情電影」，叫財爺支持本地創意產業，請佢周三去首映禮，但財爺周三要去立法會開會，所以噚晚去咗陶傑搞嘅試映會，先睹為快。