網民解拆DSE 題 「識答一定係答B」

【明報專訊】中學文憑試（DSE）上星期已經考咗幾科選修科，近日網上流傳一張「資訊及通訊科技」科嘅試題相，題目問﹕小芬係青少年，佢透過社交網站識咗個新朋友叫佩珊，佩珊約小芬下星期見面，但小芬哥哥叫小芬唔好應約，最主要嘅原因係咩？（見圖1）答案有4個選擇，當中B係小芬嘅哥哥未能參與是次約會，C係佩珊身分未確定。


有唔少網民留言話「答案一定係B！」、「識答一定係答B！」，仲有網民撮咗張周星馳舊片《逃學威龍》嘅片段圖，圖中飾演上級嘅黃炳耀協助飾演「卧底」學生嘅周星馳出貓，用電話通水話﹕「答案係B呀，個答案係B呀，B呀！」（圖2）Emily好奇怪，點解網民咁肯定個答案係B呢，於是請教男同事，佢講笑話﹕「阿哥無份去識女仔，阿妹梗係唔應該去啦」，明晒。


Emily問過考評局，局方中人話呢題係涉獵「網上威脅與保安」課題嘅文憑試題，但就唔肯講個答案係咪B。


（網上圖片）