大劉如常幫襯福臨門

【明報專訊】華置前主席劉鑾雄（圖）前日親自到廉政公署「問嘢」後，噚日如常同女友甘比到灣仔福臨門食晏，約20個記者一早喺門外等佢，想再問吓大劉去廉記究竟問咗乜嘢。大劉到場之前，咁啱長實主席李嘉誠紅顏知己周凱旋亦約咗女友人去福臨門食晏，見慣大場面嘅周小姐一落車都好奇咁問：「嘩！今日咁齊人呀？」


戴眼鏡著深色外套嘅劉鑾雄，約中午12時53分同埋手挽鮮綠色Hermès手袋同夾住橙色公文袋嘅甘比同車到場，記者即刻連珠炮發追問，但大劉只係低頭不語匆匆行入酒樓，到晏晝2時25分先出番嚟，記者再追問，佢亦只係皺一皺眉，冇講嘢就同甘比一齊上車離開。