新聞類別
財經
詳情#
【明報專訊】稻香（0573）最搶手嘅「一蚊雞」又有得賣啦﹗查實一蚊雞喺上個月28號已經開始賣緊，今年就會賣到去到呢個月17號，今年仲會主力推廣「惜食」呢個主題。雖然話搞咗無幾耐，小琴有啲識食嘅朋友，已經一早去食咗好幾轉㗎啦。
每個客食少過半隻 即捐1蚊
稻香行政總裁梁耀進噚日響媒體飯局上話，今年唔止想吸引識食嘅客人，仲會同社企惜食堂一齊合作，佢話以前推一蚊雞，見有啲客人點滿一枱嘅雞，最後食剩好多，所以今年決定如果每張帳單平均每個客人食唔多過半隻雞，公司1張帳單會捐1蚊比惜食堂，希望藉此宣揚珍惜食物嘅信息。
舊年一蚊雞火速賣晒，最後搞到要提早腰斬。梁生話，今年會每日賣1萬隻一蚊雞，計番成個推廣期有19日，即係話會賣成19萬隻。今年除咗有傳統嘅貴妃雞、葱油雞賣，仲多咗款潮式梅子雞。如果驚食唔晒成隻雞，仲可以畀5毫子買半隻。
雖然一蚊雞好賣，但梁生對今年生意唔太樂觀。舊年稻香純利跌8%，佢話香港通脹高、最低工資升、內地又限三公消費，2013年係上市以來最嚴峻嘅一年，今年應該延續同樣問題。預計今年同店銷售增長可以按年持平，另外中、港會再開20幾間店。為平衡成本壓力，公司年初略為加左價，但年內應該唔會再加。
email: piano@mingpao.com
[小琴密語]
留言 (0)
