「陳奕迅」籲遠離危坡

【明報專訊】前晚黑色暴雨兼多個地區落雹，又係網民發揮無限創意嘅時候，又一城商場被改成「水舞間」宣傳照、九龍塘東鐵站仲變成「水上樂園」，但原來除咗網民，發展局都有一齊改圖，呼籲市民喺暴雨下要遠離危險斜坡。


話說早前歌手陳奕迅為世界自然基金會（WWF）拍下硬照，呼籲市民多乘搭公共交通工具，但WWF只係將陳奕迅「key」上港鐵車廂內，有啲地方同背景兩隻色，穿晒崩，結果令呢幅圖成為不少網民嘅取笑對象。發展局噚日嘅facebook專頁，就畫咗陳奕迅卡通畫，叫人宣傳遠離危險斜坡喇。


網民暴雨畫面剪成「災難片」

除咗發展局改圖，有網民將前晚九龍塘又一城商場漏水造成嘅「瀑布」畫面，連同大雨下吹郁馬路上嘅「雪糕筒」、不斷上下搖動嘅坑渠蓋，剪輯成約1分鐘嘅《香港首部零成本史詩式浪漫災難4D片》，有大批網民讚好。