煲呔前副官 掌警察關係科

【明報專訊】警察公共關係科（PPRB）送舊迎新，原PPRB總警司、有「有求必應黃大仙」之稱嘅黃國偉，做咗30個月後，噚日正式交棒畀繼任人許鎮德，Emily同行家都有去同兩個阿sir聚聚。黃sir任內致力改善同傳媒關係，除咗同傳媒多次聚會交流同發放多咗資訊外，仲研發新嘅網上互動平台畀傳媒查詢突發新聞消息。黃sir有問必答，深受行家歡迎，噚日好多行家同佢影相，仲送咗感謝卡同「奧斯卡最佳進步獎」獎座畀佢。黃sir話做呢個位除咗多咗白頭髮外，都好開心識咗好多傳媒朋友，佢嚟緊會調去人事部。


許鎮德接黃國偉棒

新任嘅許鎮德當差27年，主要駐守西九龍多個警區，2007至2010年做過前特首曾蔭權副官，同埋港英年代叫「政治部」嘅「保安科」，嚟PPRB之前喺東九做策劃工作。做「煲呔」副官時，許sir難忘接待過英國前首相貝理雅，話佢好好人，亦記得回歸10周年時接待過時任國家主席胡錦濤。至於煲呔有無帶許sir周圍飲飲食食？許sir話佢主要跟住煲呔出席官式場合，私人時間佢就無參與。