陳茂波講種花 考慮每區特色

【明報專訊】春天來臨，相信唔少讀者最近經過公園、屋邨時，都發現樹木花卉色彩繽紛，發展局長陳茂波噚日就喺網誌，講吓新界各區綠化總綱圖制訂工作已分階段陸續展開，話當局會考慮每區特色，以及現時每區具代表性嘅植物，諗吓各區綠化主題。陳茂波仲好似細個上科學堂咁，同大家講本土植物。


陳茂波話，會喺合適地方種本土植物，好似紅杜鵑、龍船花等開花灌木，又話唔少香港人都鍾意去外地睇櫻花等，但呢類植物生長喺比較低溫嘅地帶，當局會考慮種吓春天開白色或粉紅色嘅花，好似遠睇似櫻花嘅宮粉洋蹄甲；亦會試吓種花期唔同、葉色會隨季節變化嘅植物，好似楓香、大花紫薇等，又會種顏色鮮艷嘅灌木，好似紅花檵木、黃金榕等，令社區更靚。


至於行人路，陳茂波話常綠嘅陰香有遮蔭用途，而喺將軍澳環保大道就選擇抗污染能力強、樹根入侵性較低嘅植物，例如狐尾椰子。