生產力局研廚餘沼氣炒餸

【明報專訊】政府近年大搞廚餘回收工作，例如將廚餘脫水，降解成肥田料。原來廚餘除咗可以種花，仲可以廢物產能，生產力促進局獲煤氣公司贊助，研究以無氧狀態，利用細菌分解廚餘，過程中釋出沼氣，再混入煤氣。


立法會噚日討論政府提出嘅擴建堆填區同建焚化爐建議。講開廢物處理，Emily噚日見到生產力局副總裁潘永生，佢話外國將食物殘渣轉化為能源，做法係要「厭氧」處理，即係喺密封環境下搵合適嘅細菌「食」廚餘，過程中釋出沼氣，由於沼氣易燃，可以混入煤氣。


潘永生話，外國手法未必啱香港，因為西餐同中餐原料雖同做法唔同，港人煮餸落油較多，所以點樣分解中餐廚餘，搵邊種細菌至啱，家做緊測試，估計明年有結果。