何俊賢識寫王維「機」

【明報專訊】民建聯漁農界立法會議員何俊賢，繼前日話中西區民主黨區議員許智峯係「瘋癲個瘋」之後，噚日喺立法會資訊科技及廣播事務委員會特別會議又有新言論，佢向港視主席王維基（Ricky）話﹕「王維基先生，你個名我識寫，係電視機個機。」「電視機」論引嚟網友熱議，有網友話佢唔識尊重人，仲有人諷刺佢係「愚民界代表」，互動市務商會會長方保僑直頭嬲到喺facebook引用相關新聞，留言鬧咗句「腦殘」。


除咗「電視機」論，何俊賢仲笑住批評王維基前言不對後語同玩語言藝術，因為通訊局喺1月溫馨提示港視可能違例，加上Ricky舊年底講到明服務可以喺屋企電視收到，家又話無諗過入屋。


何俊賢：諗起電視就會諗起佢

「電視機」論惹嚟咁多批評，何俊賢事後同Emily講，自己係真心欽佩王維基做電視嘅魄力，所以諗起電視就會諗起佢，但佢認為網上言論都有唔同派別，佢無時間睇亦唔想理，仲話政治人物心胸要廣闊，預咗會畀人批評喎。