曾鈺成爆太太追胡鬧劇

【明報專訊】立法會主席曾鈺成噚日接受商台訪問，大爆老婆係TVB忠實粉絲，無論啲劇集「點胡鬧」都會追，至於佢本人呢，如果早返屋企都會睇電視劇，但就唔會晚晚追，「斷斷續續無癮，都唔知佢講咩」。


陳志雲踢爆「即係TVB」

主持人陳志雲一開場就問曾主席睇TVB定ATV，曾主席笑住話「可唔可以唔講個台」，只係話每晚一定睇11點嘅晚間新聞，此話一出，TVB出身嘅陳志雲熟知兩電視台嘅時間表，即刻話曾主席所講嘅「即係TVB」囉。


認為鍾庭耀無偏幫泛民

近日港大民研鍾庭耀被人點名批評，曾主席被問到點睇特首梁振英民望、50分係咪合格？曾主席無正面回應，但係引述一篇文章話，如果鍾庭耀偏幫泛民，點解最近一年嘅十大立法會議員民調，排頭幾位嘅議員都係建制派？佢又話有啲人話CY評分得40幾分好低，但佢指世界上好多政府首長民望一樣好低。


另外，噚日立法會辯論由陳家洛提出有關港大民調風波同學術自由嘅議案。多個泛民議員質疑「梁粉」對港大特首民調「輸打贏要」，係政治打壓。建制派議員普遍認為民調風波與學術自由無關，話學者應該專注教學同研究。


最後立會否決陳家洛提出捍衛學術自由動議，幾個議員提出修訂亦都被否決埋。署理教育局長楊潤雄話，學術自由同言論自由係香港核心價值，未有實質證據前，唔應該將評論同意見視作學術干預。