廉署特輯捲版權風波

【明報專訊】廉署早前伙拍新華社旗下新華電視台製作嘅《廉政公署40周年特輯》，被指太高調提及即將開審嘅「新地案」，有法律界人士質疑套片藐視法庭，搞到律政司都要搵老廉了解吓。


點知一波未平，一波又起，喺香港上市嘅新華電視控股有限公司，噚日喺港交所出通告，話中央電視台同浙江電視台早前未經佢哋同意播咗條片，引起佢哋董事會注意，認為可能侵犯咗版權，新華電視已經向佢哋發出律師信，可能會有進一步行動。


Emily聽聞條片廉署無版權嘅，今次「版權風波」未必關佢事，但相信上次「藐視法庭風波」都仲有手尾跟。不過，Emily覺得，其實呢類節目版權廉署應該有一份，咪可以選取部分劇情畀唔同機構播放下，咁咪可以合作之餘，又可以做到宣傳教育嘅效果。