民記黨友因為樹根口啞啞

【明報專訊】港府噚日舉行最後一場政改早餐會，民建聯立法會議員鍾樹根會上忽然將特首普選同《基本法》23條立法扯上關係。雖然佢之後喺立法會至少兩度澄清言論，但佢朝早發表完偉論後，無跟民建聯大隊見傳媒就先行告退，搞到一眾與會民建聯成員其後被傳媒問起23條時，都面有難色口啞啞，咁啱佢哋離開時政總自動門一度打唔開，搞到民建聯蔣麗芸都要大嗌﹕「畀條路我哋行啦！」


元秋倡增女性代表 黃碧雲反駁

民建聯黨團召集人葉國謙喺早餐會後，被問到席間有無黨友提過23條立法時打咗個突，政壇元秋蔣麗芸心急搶答為葉國謙解圍，話民建聯議員只係表達個人意見，之後仲岔到去話有泛民議員支持佢嘅建議，喺提委會增加女性代表成分。不過，有份參加早餐會嘅民主黨黃碧雲就同Emily講，佢聽到蔣嘅建議時有當場反駁，指單係提委會增加女性代表界別並唔足夠，要鼓勵女性參政，早就應該取消功能組別制度喎。