鍾國斌想見素姬摸底

【明報專訊】自由黨立法會紡織及製衣界議員鍾國斌計劃8月又會去緬甸，仲打算約見緬甸民主派領袖昂山素姬，唔通係想向昂山素姬就民運取經？咁你就諗多咗，其實佢話只係想去「摸底」。


緬甸明年舉行大選，緬甸反對派「全國民主聯盟」早前表明會參選。喺當地有業務嘅鍾國斌評估，如果該黨最後真係派昂山素姬出選，以對方目前受歡迎程度，有機會贏到總統選舉，所以正安排同對方會面。鍾國斌最擔心嘅都係昂山素姬當選後嘅經貿政策會唔會傾向民粹，所以打算喺選舉前探一探對方對外開放政策嘅睇法，先求個安心，萬一唔對路，就要通知定當地嘅香港中小企。