宣傳減廢回收 大嘥鬼進軍七欖

【明報專訊】眼闊肚窄、頭大身細嘅「大嘥鬼」進軍國際七人欖球賽！環境局長黃錦星透露，大嘥鬼由今個星期五（28日）開始，一連3日會去喺大球場舉辦嘅國際七人欖球賽場地，宣傳減廢同回收。大嘥鬼會唔會披甲上陣打埋一份，局長話要賣個關子，但佢相信到時可以做到宣傳減廢又開心嘅氣氛。Emily就覺得大嘥鬼嘅身形幾有霸氣，到時或者可以打場友誼賽。


會否落場？ 黃錦星：留意大嘥鬼真身

黃錦星話欖球賽咁大型嘅活動，無可避免會產生好多垃圾，所以趁今次機會同主辦單位商討一齊宣傳減廢。Emily問局長會唔會一齊同大嘥鬼落場，佢就叫大家到時睇吓大嘥鬼「衣服」入面係邊個喎。


另外，立法會環境事務委員會早前出訪英國、荷蘭、丹麥同瑞典，視察當地廢物處理設施，立法會特別搞咗個展覽同大家分享議員所見所聞。最近「三堆一爐」（擴建填堆區及建焚化爐）打算再闖立法會，被問到歐洲之旅係咪可以「箍票」，黃錦星話立法會議員睇完最新嘅廢物處理科技，會明白呢啲設施對城市嘅必須及對環境嘅影響，相信佢哋可以更正面理解社會需要。