茂波唔覺意講阿里巴巴？

【明報專訊】發展局長陳茂波日前帶咗一眾香港企業北上上海，參加滬港大交流，一大批人又參觀自貿區、又同上海市領導見面，忙個不亦樂乎。雖然今次主題係以認識上海發展為主，但「波波」都趁機會宣傳香港嘅優勢，但唔知點解，講到香港作為資本市場嘅優勢時，會不自覺提到阿里巴巴棄港赴美上市一事。


波波話，好多人認為內地企業去美國上市好處好多，覺得美國上市規則有彈性、市盈率又高，籌錢可以籌好多。Emily聽到頭兩句，已經諗﹕呢個係唔係講緊阿里巴巴呢？點知波波自己突然插了一句，「我不是在說阿里巴巴」。


話老外唔了解內地企業

台下一陣笑聲後，波波繼續講，其實老外對內地嘅企業並唔係真了解，所以有啲內地公司出咗去後股票流通量唔好，股價反映唔到公司價值，等到要再籌資時就遇到麻煩。但如果來香港上市，香港好多投行分析員對內地企業十分熟悉，企業如果要做第二次、第三次融資都好容易，「一單幾百上千億嘅融資，兩日之內就能做到」。看來阿里巴巴唔止喺投資者之間掀起風波，仲觸動到政府官員敏感嘅神經。