投票選香港Wi-Fi標誌

【明報專訊】上網幾乎係香港好多人每日嘅指定動作，而政府亦喺公共地方設立Wi-Fi熱點，方便市民同遊客隨時隨地上網。早前財政預算案話Wi-Fi熱點數目將倍增至兩萬個，政府資訊科技總監辦公室就設計咗5個Wi-Fi標誌，希望市民投票選出日後通用嘅Wi-Fi品牌。


4月截止 下月底公布結果

資訊科技總監辦公室發言人話正同業界合作，設立Wi-Fi品牌推廣免費或設有免費使用時段嘅Wi-Fi服務，提供5個標誌畀公眾投票，最高票一個會被採納，投票噚日開始至4月6日，結果下個月底公布。


呢5個畀人投票嘅logo都寫有「Wi-Fi HK」嘅字句，每個唔同意念都有獨特意思，好似其中一個似燈塔，意味Wi-Fi好似網絡世界嘅燈塔，透過上網等大家可以傲遊世界；亦有標誌突出「i」字，除咗似信號塔，亦希望帶出「我」字，代表「由我接收，由我發放」。


讀者對投票有興趣，可以登入網址﹕commonwifibrand.hk