政改論壇 劉夢熊似泛民贏掌聲

【明報專訊】政改討論中，中央強調特首要愛國愛港，有人解讀為民主派喺中央眼中係對抗中央嘅人，並唔愛國愛港。不過，前全國政協委員劉夢熊噚日出席公民黨嘅政改論壇時，就提到絕大多數港人都係愛國愛港，仲話民主派都係「善意批評」中央同特區政府，並唔係對抗表現，佢嘅言論令台下觀眾多次拍手讚好。


望改善提委會 減漁農議席

劉夢熊噚日出席公民黨政改論壇，喺一眾講者中算係屬於建制嘅一人，但佢就話，除咗唔贊成佔中外，對政改嘅建議唔算保守，佢話政改要尋求共識，提名委員會就要有啲改進，四大界別嘅比例要均等，但當中都可調整，如漁農界唔應該有咁多議席、公司票就應該開放至個人票等，至於提名門檻，佢覺得應該要維持八分之一提委提名，做法同現時選委會相同。


「大多數港人愛國愛港」

劉夢熊話，希望中央相信香港大多數人都係愛國愛港，無咩理由會選對抗嘅人做特首，強調若提委會要講「集體意志」，「究竟係應該尊重1200人嘅集體意志，定係350萬人（選民）嘅集體意志？」Emily仲以為聽緊民主派發言，難怪佢贏得唔少掌聲。