海怡西補選 陳家珮勝出

【明報專訊】因為馮煒光入政府做新聞統籌專員，令南區海怡西選區出缺，噚日舉行區議會補選，3個候選人全力拉票，令海怡變成「旗海」。部分候選人大打告急牌，噚日中午民主黨團隊已經舉起寫住「票數接近」、呼籲大家集中投票畀單仲偕嘅大型紙牌拉票；但亦有小插曲，有自稱係民主黨創黨成員嘅人搞局，喺民主黨團隊前高舉「投單仲偕 要諗清楚」嘅紙牌，仲不斷狙擊單仲偕，據稱搞到單仲偕要避開佢以免尷尬。


單仲偕承認慘敗

投票噚晚10點半結束，4059人投咗票，投票率53.65%，陳家珮以2023票當選，而單仲偕承認慘敗，他獲得920票。


選情被睇高一線嘅新民黨陳家珮，新民黨亦傾盡全力為佢拉票，除咗兩名立法會議員葉劉淑儀同田北辰到場落力拉票外，葉太亦利用其政界人脈關係，搵到唔少政界中人拉票，行政會議成員李國章、立法會議員姚思榮噚日亦到海怡為佢打氣，一齊企街舉起「OK」手勢呼籲選民投畀3號，一場區會補選，咁多政界大粒人馬出現，呢個畫面都少見。陳家珮夜晚亦出動告急單張，話自己選情嚴峻。


至於選舉期間日日走入海怡同選民揮手嘅人民力量袁彌明，雖然無乜嘢明星拉票，但佢同成隊義工都好努力，袁彌明亦把握機會同經過嘅街坊握手拉票，小朋友都唔放過。