佔中派《中紙》談宗旨

【明報專訊】「和平佔中」義工隊正式起動，噚日喺銅鑼灣行人專用區叫市民舉起「宗旨」？原來係一班義工喺街頭派發和平佔中報章《中紙》。《中紙》呢個名係喺約20個候選名稱中，經「民主程序」脫穎而出，顧名思義，係「佔中」官方報紙，亦可解作「終止」不公義制度，佢哋又話，如果大家對住梁振英政府太憤怒，咁或者要舉起「中指」喎！


取消佔中為題 解釋行動宗旨

台灣學生佔領立法院多天，佔中就被人話慢吞吞，發起咗成年都未做，所以近日好多人都會問，究竟幾時先佔呀？估唔到首期《中紙》就以「取消佔中」為題，連象徵和平佔中嘅雀仔，都畀自己人惡搞，雀仔個頭被斬咗一半。原來一切只係煙幕，《中紙》創刊號就以問答形式解釋佔中行動宗旨，講明除非有真普選，否則實行佔中。所以，家先要做準備工作，一旦政府拋出「爛方案」，佢哋先出師有名去行動喎。


100義工每日一街站派報

創刊號仲有「佔中十死士」之一錢志健嘅「找死之路」訪問。想知道佔中信息，可以攞份《中紙》睇睇，未來幾日行街就要留意身邊有無佔中街站。


佔中義工隊長周鎮聲話，目前已招募到約100個義工，成員老中青都有，嚟緊會每日一街站，繼續派《中紙》，解釋佔中行動細節。另外，佔中會喺6月22日舉行全民投票日，7月1日舉行誓師日。