網民「掟」Eason迫港鐵

【明報專訊】香港世界自然基金會（WWF）為宣傳下周六舉行嘅「地球一小時」，學網民製圖，將歌手陳奕迅（Eason）嘅相「key」落一個無乜人嘅港鐵車廂，鼓勵市民多用公共交通工具。點知張圖變成網民嘅「潛力圖」，噚日不斷被修改，其中有人更將Eason放番入一個人多擠迫嘅港鐵車廂入面，話咁先反映現實。


嫌原圖「褪地」水皮 車廂少人

有眼利網民發現，WWF張圖Eason個影像臂彎有白色，無「褪地」配合番張原圖，質疑WWF改圖技巧「水皮」。另有多名網民發揮二次創作，其中「福佳與林忌創作」就質疑家港鐵車廂無可能好似WWF張圖咁少人，於是將Eason「key」放落一個擠迫車廂，然後配番文字話呢個先係現實。


WWF：設計為籲改坐公共交通

WWF發言人就話，Eason提供嘅環保貼士係，如果有時去較近嘅地方，都唔坐私家車改坐公共交通工具，張圖係根據呢個貼士而設計，又再次多謝支持活動宣傳嘅藝人。