「金鍾仁」是誰 政府話無資料

【明報專訊】署名作者「金鍾仁」究竟係咪新聞統籌專員馮煒光（圖）？呢個問題雖然唔少政界人士已答到出口，但無論當事人、政府都不置可否。曾被「金鍾仁」喺報章撰文點名批評嘅自由黨黨魁田北俊就再次出招，要求政府喺立法會回應，但政府只係話「我們沒有政府官員以筆名發表文章的資料」，即係無直接承認或否認。


「政治委任官員以官職身分發言」

議員黃毓民就向政務司長林鄭月娥提出書面提問，指「金鍾仁」曾撰文評論樓市辣招，所以要求林太答吓，新聞統籌專員喺《2012年印花稅（修訂）條例草案》嘅公共關係策略中，具體有咩職責。林太書面回覆，話專員嘅職責包括宣傳政府政策，所以專員職務亦適用喺政府應對樓市情况推出嘅需求管理措施，例如呢條印花稅條例。


林太又喺回應田北俊時話，政治委任官員必須竭盡所能促進政府利益。政治委任官員嘅工作包括與立法會、政黨、政團、傳媒，以及社會各界及地區人士以不同方式，包括發表文章，解釋政策，爭取支持。不過，林太話，政治委任官員嘅發言，都係以其官職身分作出。