長者細個入中區警署睇電視

【明報專訊】近年流行本土情懷，唔少人話好懷念舊日嘅人情味，為咗讓市民回味吓香港社區發展，馬會早前拍咗一輯共5集嘅《情繫社區》短片，邀請咗天水圍、中環、沙田、灣仔同西貢5個區嘅老街坊，同大家分享佢哋嘅故事。


期待活化後重遊

其中一個故事係關於一位年過六十嘅的士司機「耀仔」，佢話自己5歲開始喺中區住，喺人哋眼中，中環係一個返工同「夜蒲」嘅地方，但佢就喺中區成長、結婚同生仔，佢話印象最深刻嘅事係1960年代走遍中區送外賣嘅趣事，包括當年最大娛樂，就係同一班小朋友偷偷竄入中區警署嘅警員休息室，偷看當年好少有嘅黑白電視。耀仔話對於馬會撥款保育活化中區警署建築物群，非常期待，打算喺工程完成後同孫仔一遊中區警署。


《情繫社區》短片噚日開始一連5晚10點半，喺無綫電視翡翠台首播，大家可以留意吓。