邵善波反駁卿姐 「我有咁大影響力？」

【明報專訊】中央政策組首席顧問邵善波（圖）早前接受訪問時話，中聯辦參與立法會拉票工作並無問題，惹來泛民強烈反彈，民主黨主席劉慧卿更開口叫邵善波道歉。但邵善波噚日見到Emily，就叫Emily反問番卿姐，有無透過中間人同中聯辦溝通，話自己講嘅說話，完全同事實相符，又話如果「我講一句說話，就可以毁滅一國兩制，我有咁大影響力，香港就唔使搞成咁」。


邵善波呢幾日喺北京出席政協會議，都一反常態，好肯講嘢，好似特首梁振英（CY）同財政司長曾俊華係咪合作得唔好嘅問題，邵善波就話兩人「完全無不和」。佢話，以佢理解，財政司長係斯文理性嘅人，佢對香港未來財政狀况做咗深入、專業嘅研究，畀社會討論，話呢啲係好事嚟嘅。


談政助離職頻 「多啲先正常」

CY上任以來，多名問責官員離職，其中以政治助理最多。被問有無跳船潮，邵善波話「應該再跳多啲先正常」。佢形容記者嘅想法過時，又拋出美國例子，話現時任命嘅部長，任期平均唔到3年，指香港官員嘅任期已經係過分長。但佢承認本港唔係好夠政治人才，所以以前主要靠前高官出嚟做局長。


邵善波咁樂意講嘢，唔知有無興趣去立法會講喇，公民黨陳家洛就話，邵善波言論惹火，所以去信立法會政制事務委員會主席譚耀宗，要求委員會邀請邵善波上去委員會傾吓偈喎。