幫青年「職場打底」 新地師父制 10年助163人

【明報專訊】會考成績欠佳唔等於世界末日，新鴻基地產2003年開始同突破機構合辦「師徒創路學堂」計劃，讓會考欠佳同學有機會喺新地轄下公司實習，包括物業管理、客戶服務等工種，過程中由資深員工做「師父」，以師徒形式傳授職場同溝通技巧幫學員「打底」，計劃推行10年至今已有163名青年「畢業」。


本月30日就業博覽 職位逾千

首屆學員汪蔚宗同何倩凝，同樣2003年會考成績唔理想，但參加計劃一齊喺新地旗下力安護衛實習後，喺董事黃天厚擔任師父指導下提升自信，輾轉一做10年，仲由當初行政助理，晉升到做客戶服務主任職級。其中會考6科得1科美術及格嘅何倩凝，就用畫漫畫形式，向顧客深入淺出解釋防盜警鐘等複雜系統，發揮興趣所長。


另外，新地本月30日於將軍澳九龍東皇冠假日酒店舉行就業博覽，提供逾千個職位空缺，涵蓋地產、建築、酒店同電訊等8個行業。新地內務部主管鄧卓軒話，職位薪酬符合市價，當中部分初級職位仲會有即場面試