沙田婚姻登記處 藝術家拼出囍點

【明報專訊】家去沙田大會堂、灣仔伊利沙伯體育館，大家會發覺多咗唔少藝術氣息。民政事務局2010年起推出「藝聚政府大樓」公共藝術計劃，至今已為9座政府大樓添加藝術元素，噚日當局公布新一期由4位本地藝術家參與創作嘅建築物，分別係沙田大會堂、伊館、郵政總局同紅磡社區會堂，展期即日起至明年3月31日。


4建築物 加藝術元素扮靚

其中藝術家胡慧中就利用取巧嘅透視角度，拆解個「囍」字，散落到沙田大會堂婚姻登記處入口走廊位，要搵到拼合「囍」嘅視點，過程有如搵到「Mr Right」咁，而創作命名《囍點》，取其諧音「起點」，比喻婚姻就係人生另一起點。


伊館就有陳閃創作《把風箏放回天空》，從雲朵同放風箏畫像，寓意將都市生活壓力釋放天空。史穎怡就為郵政總局創作《信•念》，將徵集市民信件嘅精警句子印落半透明膠貼，貼喺大樓玻璃窗。而黃慧妍則為紅磡社區會堂創作《這世界上我們的小角落》壁畫，內容係九龍城同紅磡沿途風景。