葉劉做大茄 零片酬扮區議員

【明報專訊】行政、立法兩會成員葉劉淑儀，最近「降呢」去咗做區議員？葉太唔係走去選區會，而係「撈過界」闖影圈做演員是也。佢喺卓韻芝執導嘅電影中，扮演區議員「葉劉淑之」角色，戲中處理鄭秀文嘅投訴個案，葉太話好開心可以同張家輝、鄭秀文等好戲之人「鬥戲」，但話自己其實只係一個得幾句對白嘅「大茄」！


支持創意產業

葉太噚日喺facebook上載佢拍戲期間影嘅相。佢話今次係零片酬客串電影，目的係希望支持香港電影創意產業，及盡下綿力支持年輕人。佢又話導演兼編劇卓韻芝年輕有為，敢於多方面嘗試，係佢答應客串嘅另一原因。


「葉劉淑之」又話，劇中角色既反映區議員工作辛苦，又能帶出議員服務市民嘅正面信息，難得電影公司唔介意佢係影壇初哥，又能過過戲癮，何樂而不為？佢又讚兩個主角張家輝及鄭秀文都係出色演員，能夠同佢哋合作感到好榮幸。佢仲讚兩人喺鏡頭前表現專業、鏡頭下斯文有禮，而張家輝為人好搞笑，真係有「化骨龍」（張飾演過嘅經典角色）嘅影子。