李剛引美報：澳門係天堂

【明報專訊】曾經喺香港做過中聯辦副主任嘅李剛，家喺澳門陞官做咗中聯辦主任，Emily噚日喺北京嘅澳門區人代小組會議後見到佢，李主任就大談一國兩制，大讚澳門回歸15年來，一國兩制、澳人治澳，「比其他地方是成功」嘅。記者問到香港情况，李飛無正面答，只係話澳門回歸以來，國民生產總值增長10倍以上，社會繁榮穩定，佢仲引述美國報紙，話澳門簡直係「天堂」。唔知李主任喺濠江感唔感受到「天堂」嘅快樂？


不贊成驅趕遊客

港澳工作協調小組組長、全國人大常委會委員長張德江前幾日先叫香港人要守《基本法》，搞普選唔可以搬其他國家嘅民主模式，否則會「水土不服」，帶來災難後果。而「轉咗會」嘅李剛，前幾日一直唔願意多談香港，但噚日開完會，就肯評論吓香港嘅「驅蝗行動」。李剛話，澳門係要建立一個世界性嘅旅遊中心，遊客來得適度、澳門能承受，能為澳門發展帶來機遇，唔贊成驅趕遊客嘅做法。


現任澳門特首崔世安不久前宣布有意角逐連任，李剛亦評價，話崔世安喺貫徹《基本法》依法施政、發展經濟、改善民生、促進和諧、循序漸進地推進民主、建立陽光政府等都有好多成就，過去5年做得「很不錯」。