政協赴宴增K字認證

【明報專訊】兩會期間世界發生唔少大事，好似昆明斬人案、馬航客機失蹤，喺北京聚集咗一眾領導同人代、政協委員，近日保安亦極為嚴密。噚晚政協主席俞正聲喺政協禮堂宴請港澳政協，亦加強咗保安，即使出席嘅係政協委員，佢哋嘅證件都要貼上辨識標貼做認證，十分認真。


赴京開會嘅政協，行去開會都掛上政協證件，上面有相片之餘亦有認證，只要行入人民大會堂，經過部檢測機就會自動「點名」，機器會顯示持證人相片，助公安人員核證；但噚日佢哋下午開會前，政協工作人員就為各人證件貼多一個「K」字貼紙，以便夜晚去俞正聲晚宴時做多重識別。


俞正聲晚宴 喝長城牌酒

今年中央奉行節約，政協都做好心理準備，即使領導人請食飯，亦唔會食得好豐盛，亦有唔少政協預咗有下一場，同其他人再食過。據悉，呢餐飯飲長城牌葡萄酒，亦有食芝士蝦，鹹、甜麵包等，有委員以「以前都簡約，現在更簡約」嚟形容。部分政協委員食完飯亦無返酒店，即刻去下場。