威院一哥係Kevin校友

【明報專訊】沙田威爾斯醫院近期牽涉唔少風波，接替馮康做新界東聯網總監嘅熊志添，噚日同記者行家聚餐，大家當然好關注余卓文封刀同易小玲事件。但係，最擅長耍太極嘅熊志添，一開波就話唔傾呢兩件事，仲主動將話題轉移到《明報》前總編輯、世華網絡營運總裁劉進圖（Kevin）遇襲重傷一事。


唔講余卓文易小玲

熊醫生自爆話同劉進圖係九龍華仁書院校友，但自己老好多，起碼「高10班」咁話。佢唔識劉進圖，但以前睇過校刊訪問唔少著名校友，劉係其中一粒星。1956年出世嘅熊醫生今年58歲，大劉進圖9年。


同場嘅威院副行政總監李錦滔就話，佢同劉進圖識於「微時」，80年代佢去英國倫敦做腎科研究，咁啱當時好朋友、現港大法律學院院長陳文敏喺倫敦做研究，閒時會同埋喺當地讀法律碩士嘅劉進圖出來打波，返港後就少聯絡。


李醫生席上講起舊事，30年前仲未有威院，每晚救護車會將受傷嘅新界古惑仔，儲夠一車送去伊利沙伯院。當時佢喺伊院做急症室醫生，每日都見有「左青龍右白虎」病人，見盡唔少用刀斬人嘅個案。