余俊翔報名「東涌北」區會補選

【明報專訊】早於半年前就「下降凡間」、喺東涌服務嘅公民黨年輕大狀兼地區發展主任余俊翔（Peter），噚日正式宣布參選東涌北區議會補選。佢話東涌值得更好嘅民生設施，所以會提出一系列建議，改善區內交通同醫療措施。黨主席余若薇就祝佢人如其名，可以「進場（粵音與「俊翔」相同）成功」。


余若薇祝「進場」成功

東涌離島區議員林悅早前因提交虛假文書被判罪，失去議員資格，所以該區有議席空缺。Peter大約半年前落區，密密同街坊打交道。佢噚日報名參選時，余若薇、黨魁梁家傑、立法會議員郭家麒同陳家洛，仲有一啲東涌嘅街坊都有去撐場。佢之後已經即刻落區嗌咪，爭取街坊支持。


Peter話政府銳意發展大嶼山，既是挑戰，亦是機遇，所以必須平衡發展。但佢就反對發展郊野公園土地同盲目填海，因為要守護東涌美景。